MWENYEKITI WA KITONGOJI SINGIDA AHUKUMIWA JELA MIAKA MIWILI KWA WIZI WA SH. 100,000/=.

Bango la mahakama ya hakimu mkazi mjini Singida.Picha  na Nathaniel Limu.

Na Nathaniel Limu.

Mwenyekiti wa kitongoji cha Miyombwe kijiji cha Mkinya jimbo la Singida Mashariki Michael Andrew Khaliki (53), amehukumiwa adhabu ya kwenda jela miaka miwili baada ya kupatikana na hatia ya wizi wa shilingi laki moja, iliyokuwa itumike kugharamia ujenzi wa shule ya sekondari ya kata ya Dung’unyi.

Mapema mwansheria wa TAKUKURU mkoa wa Singida Antidius Rutayuga alidai mbele ya hakimu wa mahakama hiyo Tyephosofia Tesha kuwa mnamo septemba 16 mwaka 2008 huko katika kijiji cha Mkinya, mshitakiwa alipokea shilingi 180,000 kutoka kwa Elias Kiemi ikiwa ni mchango wa familia yake kwa ujenzi wa shule ya sekondari ya kata ya Dung’unyi,

Amesema kati ya fedha hizo mshitakiwa Michael alitumia shilingi laki moja kwa matumizi yake binafsi jambo ambalo ni kinyume na sheria.

Mwanasheria huyo wa TAKUKURU alisema kuwa hata hivyo, mlalamikaji Eliasi alifanya juhudi kubwa kudai stakabadhi ya mchango wa shilingi laki moja  kutoka kwa mshitakiwa Michael, lakini hata hivyo, juhudi hizo hazikuweza kuzaa matunda na kupelekea afike ofisi ya TAKUKURU mkoa,kutoa taarifa.